News

Meng Bo ដាក់​ផែន​ការ​ផ្តួល Santos ឲ្យ​សន្លប់​ដើម្បី​ឆក​ឱកាសខ្សែក្រវាត់ពិភពលោក

Meng Bo បានក្លាយ​ជា​កីឡាការិនីដ៏​ល្អ​ម្នាក់​នៅ​ក្នុង​ចំណោម​អ្នក​លេង​គុន​ចម្រុះនៃ​​ប្រភេទ​ទម្ងន់ atomweight រយៈ​ពេល​​មួយ​ឆ្នាំ​កន្លះហើយ​​ ហើយ​នាង​ដាក់​គោល​ដៅ​ធ្វើ​ឲ្យ​បាន​ល្អ​បំផុត​នា​ថ្ងៃ​សុក្រ ទី​២២ ខែ​មករា​នេះ។

រាត្រី​នោះ កីឡាការិនី​គុន​ចម្រុះ​ចិន​ត្រូវ​ឡើង​សមរភូមិ​ប្រយុទ្ធ​ជា​មួយ​នឹង​អតីត​អ្នក​ប្រជែងខ្សែ​ក្រវាត់​​ពិភពលោក Samara “Marituba” Santos នៅ​ព្រឹត្តិការណ៍ ONE: UNBREAKABLE ក្នុង​ប្រទេស​សិង្ហបុរី។

Meng ដែល​មាន​ចំណាត់​ថ្នាក់​លេខ​២​ក្នុង​ប្រភេទ​ទម្ងន់ atomweight មា​អារម្មណ៍​ល្អ​អំពី​ការ​ហ្វឹក​​ហាត់​​មួយ​រយៈ​ពេល​ចុង​ក្រោយ​នេះ និង​កំពុង​រះ​ត្រដែត​ជា​កីឡាការិនី​លេច​ធ្លោ​ម្នាក់។

កីឡាការិនី​អាយុ​២៤​ឆ្នាំ​បាន​និយាយ​ថា ៖«យើង​​មិន​ដឹង​ថា នឹង​មាន​អ្វី​កើត​ឡើង​នៅ​លើ​សង្វៀន​រហូត​ដល់​កណ្តឹង​បន្លឺឡើង ហើយ​ការ​ប្រកួត​មាន​លក្ខណៈ​ខុស​ៗ​គ្នា។ អ្វី​ទាំង​អស់​ដែល​យើង​អាច​​ឆ្លើយ​តប់​បាន​គឺ ការ​ត្រៀម​ខ្លួន។ ក្រៅ​ពី​នេះ ខ្ញុំ​ពិត​ជា​ទុក​ចិត្ត​លើ​បច្ចេកទេស​របស់​ខ្ញុំ»។

តារា​គុន​ចម្រុះ​ចិន​ពិត​ជា​មាន​អារម្មណ៍​ជឿ​ជាក់​ណាស់។

នៅ​ក្នុង​ការ​ប្រកួត​លើក​ដំបូង​នៅ ONE: AGE OF DRAGONS កាល​ពី​ខែ​វិច្ឆិកា ឆ្នាំ​២០១៩  Meng បាន​ផ្តួល​អតីត​អ្នក​ប្រជែង​ខ្សែ​ក្រវាត់​ពិភព​លោក​ Laura “La Gladiadora” Balinដោយចំណាយ​ពេល​មិន​ដល់​៣​នាទី​ផង។

បន្ទាប់​មក នាង​ទទួលបានជ័យជម្នះ​នៅ​ក្នុង​ទឹក​ទី​១ តាម​រយៈ​ការ​ចេញ​សមត្ថភាព​ដ៏​ល្អក្នុង​ការ​ផ្តួល​កីឡាការនី​លំដាប់​កំពូល​របស់​ប្រទេស​ឥណ្ឌូណេស៊ី Priscilla Hertati Lumban Gaol ដោយ​ប្រើ​ពេល​តែ​៨៦​វិនាទី នៅ​ ONE: INSIDE THE MATRIX II កាល​ខែ​វិច្ឆិកា ឆ្នាំ​២០២០។

Meng និយាយ​ថា ៖«ទោះ​បី​​ជា​ ខ្ញុំ​មាន​ជំនាញ​​វ៉ៃ​ឈរ​ តែ​ខ្ញុំ​ក៏​ល្អ​ជំនាញ​ក្រោម​ដែរ។ និយាយ​ទៅ​ ខ្ញុំ​​ចូល​ចិត្ត​ផ្តួល​ដៃ​គូឲ្យ​សន្លប់»។

Chinese MMA star Meng Bo knocks out Indonesian MMA fighter Priscilla Hertati Lumban Gaol at ONE: INSIDE THE MATRIX II in Singapore

ទោះ​បី​ជា​យ៉ាង​ណា Santos ក៏​មិនមែន​ដំឡូង​មូល​ដែល​បណ្តោយឲ្យ​កីឡាការិនី​ចិន​បង្ក​ព្យុះ​ភ្លៀង​តាម​អំពើ​ចិត្ត​ដែរ។

កីឡាការិនី​​​នេះ​ជា​ជើង​ឯក​​គុន​ចម្រុះ​ប្រេស៊ីល​​ពិត​ជា​អ្នក​បញ្ចប់​ដៃ​គូ​ ដ៏​មាន​ប្រសិទ្ធភាព​ម្នាក់​ដែរ​ដោយ​ជ័យជម្នះ​អាជីព១២​ដង​គឺ​រក​បាន​ដោយ​ផ្តួល​ដៃ​គូ​ឲ្យ​សន្លប់​ ឬ​ដៃ​គូ​សុំ​ចុះ​ចាញ់។

បន្ទាប់​ពី​ចូល​រួម​ជា​មួយ​ ONE កាល​ពី​ឆ្នាំ​២០១៨ Santos បាន​ប្រកួត​ក្នុង​ទម្ងន់ធ្ងន់​បន្តិច​ strawweight ដែល​នាង​ជួប​នឹង​រាជនី​សង្វៀន​ “The Panda” Xiong Jing Nan និង​បាន​បង្ហាញ​ជំនាញ​ឃ្លេ​ដ៏​គ្រោះ​ថ្នាក់​​នៅ​ដើម​ទឹក​ដល់ម្ចាស់​ខ្សែ​ក្រវាត់​ពិភព​លោក។



ឥឡូវ​នេះ កីឡាការិនី​រហស្សនាម “Marituba” មក​ប្រកួត​ក្នុង​ទម្ងន់​ដែល​ត្រូវ​នឹង​ទម្ងន់​ដើម​របស់​នាង ហើយ Meng ដឹង​ថា ដៃ​គូ​ម្នាក់​នេះ​មាន​ជំនាញល្អ។

កីឡាការិនី​ចិន​និយាយ​ថា ៖«​គាត់​ជា​ដៃ​គូ​ដ៏​តឹង​តែង​ម្នាក់។ គាត់​ជា​កីឡាការិនី​ប្រេស៊ីល​ដែល​ពូកែ​ខាង​ក្បាច់​ក្រោម។ ប៉ុន្តែ​តាម​អ្វី​ដែល​ខ្ញុំ​កត់​សំគាល់​ពី​ការ​ប្រកួត​របស់​គាត់​កន្លង​មក គាត់​បង្ហាញ​ជំនាញ​វ៉ៃ​ឈរ​​ល្អ​ជាង ហើយ​ចូល​ចិត្ត​ប្រើ​ជំនាញ​ក្រោម​នៅ​​ទឹក​ក្រោយ​ៗ»។

ទោះ​ជា​យ៉ាង​ណា Meng មាន​ជំនឿ​យ៉ាង​មុត​មាំ​ថា នាង​នឹង​ចាក​ចេញ​ពី​កីឡដ្ឋាន​ Singapore Indoor Stadium ជា​មួយ​នឹង​ជ័យជម្នះ​លើក​ទី​១៦​របស់​នាង។

នាង​និយាយ​ថា ៖«​ការ​ពិត​ត្រូវ​បាន​ប្រាប់​ហើយ គ្មាន​បញ្ហា​ទេ​ចំពោះ​អ្វី​ដែល​ជា​ចំណុច​ខ្លាំង​ ឬ​ខ្សោយ​របស់​នាង គឺ​ខ្ញុំ​​នៅ​តែ​សង្ឃឹមឈ្នះ»។

Chinese MMA star Meng Bo knocks out Indonesian MMA fighter Priscilla Hertati Lumban Gaol at ONE: INSIDE THE MATRIX II in Singapore

ប្រសិន​បើ​  Meng ទទួល​បាន​ជ័យជម្នះ​ពី​ការ​ប្រកួត​នៅ ONE: UNBREAKABLE ជា​ពិសេស​ដោយ​ក្បាច់​ពិសេស​ៗ​ទៀត​នោះ កីឡាការិនី​ចិន​នេះ​អាច​នឹង​ក្លាយ​ជា​បេក្ខនារី​ម្នាក់​សម្រាប់​កម្មវិធី​ប្រកួត​ជើង​ឯក​ពិភព​លោក ONE Atomweight World Grand Prix។

បើ​ទទួល​​បាន​លទ្ធផល​ដ៏​អស្ចារ្យ​ទៀត​នោះ​អាច​នឹង​ផ្តល់​ឲ្យ​កីឡាការិនី​ចិន​នេះ​ទទួល​បាន​ឱកាស​ដ៏​ធំ​បំផុត​​​ទៅ​ប្រកួត​ដណ្តើម​ខ្សែ​ក្រវាត់​ពិភព​លោក​ជា​មួយ​នឹង​រាជនី​សង្វៀន​ “Unstoppable” Angela Lee

Meng និយាយ​ថា ៖«ខ្ញុំ​ពិត​ជា​ចាប់់​អារម្មណ៍​ខ្លាំង​ចំពោះ​កម្មវិធី​ប្រកួត​ដណ្តើម​ខ្សែ​ក្រវាត់​ពិភព​លោក ONE Atomweight World Grand Prix»។

«ខ្ញុំ​មាន​ចំណាត់​ថ្នាក់​លេខ​២​នៅ​ទម្ងន់ atomweight ហើយ​តាម​រយៈ​ ONE Atomweight World Grand Prix ខ្ញុំ​អាច​បង្ហាញ​ជំនាញ និង​ទេព​កោសល្យ​របស់​ខ្ញុំ​ដល់​អ្នក​គាំទ្រ។ ពិត​ជា​សំខាន់​បំផុត​នោះ ខ្ញុំ​អាចបញ្ជាក់​ថា ខ្ញុំ​ពិត​ជា​មាន​សមត្ថភាព​ដើម្បី​ប្រជែង​ជើង​ឯក​ពិភព​លោក»៕

Chinese MMA fighter Meng Bo celebrates her debut victory in ONE

Read more: 5 Reasons To Be Excited For ONE: UNBREAKABLE