Kun Khmer

៣​ចំណុច​ ដែល​​អែម សុវណ្ណារី​ រៀន​​សូត្រ​ពី​ ONE Championship​

កីឡាការិនី​គុន​ចម្រុះ​​កូន​ខ្មែរ​នៅ​អាមេរិក​ អែម ​សុវណ្ណារី បាន​ចុះ​​កិច្ច​សន្យា​ប្រកួត​​នៅ​ស្ថាប័ន​​រៀប​ចំ​ព្រឹត្តិការណ៍កីឡា​ធំ​បំផុត​​ក្នុង​ប្រវត្តិសាស្ត្រ​អាស៊ី​​តាំងពីឆ្នាំ២០១៨ មក។​ ​កីឡាការិនី​សម្បុរ​ស្រអែម​បាន​រៀន​សូត្រ​ច្រើន​ទាំង​​ភាព​ជោគជ័យ​ និង ភាព​ជូរចត់​​នៅ​សង្វៀន ONE Championship  ចំនួន ៣​ ចំណុចសំខាន់ៗ។

១- ​ផ្សារភ្ជាប់​មកកាន់ប្រទេស​​កម្ពុជា ​

​​ដ្បិត​មាន​ដូន​តា​ជា​ជនជាតិ​ខ្មែរ​ បន្ទាប់​ពីជីដូចជីតានិងម្ដាយ​ភៀស​ខ្លួន​ទៅរស់នៅសហរដ្ឋ​អាមេរិក​កាល​ទសវត្សរ៍​ឆ្នាំ​១៩៨០ ​​កីឡាការិនី​រហស្សនាម​​​ “The Sweet Savage”​ ​នឹង​មិន​អាច​មាន​ទំនាក់ទំនង​មក​កាន់​ប្រទេស​ដូនតា​ដូច​សព្វថ្ងៃ​ទេ​​បើ​សិន​​មិន​​​បាន​ចុះ​កិច្ច​សន្យាប្រកួត​ឲ្យ​សង្វៀន​ ONE។ ​ហើយ​​ សុវណ្ណារី ក៏​មិន​អាចទទួល​បាន​ប្រជាប្រិយភាព​​ដូច​សព្វថ្ងៃ​នេះ​ដែរ។ ​ONE Championship បាន​ធ្វើ​ឲ្យ​ទំនាក់ទំនង​​​រវាង​ សុវណ្ណារី និង​ អ្នក​គាំទ្រ​កាន់​តែ​កៀក​កិត ជា​ពិសេស​ រូប​គេ​បាន​ចូល​រៀន​​ថ្នាក់​​ភាសាខ្មែរ​​តាម​អនឡាញ​តាំង​ពី​ខែ​ ​មករា​ ​នាដើម​ឆ្នាំ​នេះ​ក្នុង​បំណង​ឈ្វេង​​យល់​​​វប្បធម៌​​ដ៏​រុងរឿង​របស់​កម្ពុជាឲ្យ​កាន់​តែ​ខ្លាំង​ឡើង។ ​ កីឡាការិនី​រូប​នេះ​បាន​យល់​​កាន់​តែ​ច្បាស់​អំពី​​សែស្រឡាយ​ដែល​​បាន​ផ្ដល់​កំណើត​ឲ្យ​រូប​គេនាពេលនេះ។ ​ ​ពេល​ឡើង​សង្វៀន​​បន្ទាប់ ​សុវណ្ណារី​ សន្យាថា​នឹង​​និយាយ​ភាសា​ខ្មែរ​មក​កាន់​ប្រជាជន​កម្ពុជា។ ​

២- មោទនភាព​ក្នុង​ជ័យជម្នះ​

​សុវណ្ណារី ​យល់​ឃើញ​ថា​​វា​ជា​​ជ័យជម្នះ​ដំបូង​ដ៏​ល្អ​​ឥតខ្ចោះ​ក្នុង​ការ​​បង្ហាញ​ខ្លួន​នៅ​សង្វៀន​លំដាប់​ពិភព​​លោក​។​ ​​កីឡាការិនី​​មក​ពី​ក្លិប​​ Modern Martial Arts and Fitness ​ស្ថិត​នៅ​ក្រុង​ Pasadena ​រដ្ឋ​​កាលីហ្វ័រញ៉ា​​បាន​យក​​​ឈ្នះ​កីឡាការិនី​អ៊ុយក្រែន ​ Iryna Kyselova ​ដោយ​​​ផ្ដួល​​ឲ្យ​​​សន្លប់​ត្រឹម​​​ទឹក​ទី​១​កាល​ខែ​ ​ធ្នូ ​ឆ្នាំ​ ២០១៨ ពោល​ប្រើ​ពេល​ត្រឹម​ ៨១ វិនាទី​ប៉ុណ្ណោះ​ក្នុង​កម្មវិធី​ ​ ONE: DESTINY OF CHAMPIONS

​កីឡាការិនី​ដដែល​​​​បាន​ថ្លែង​ថា ៖«ខ្ញុំ​ពិត​ជា​រំភើប​ចិត្ត​ខ្លាំង​មែន​ទែន។ ​យើង​បាន​ធ្វើ​ការងារ​ខ្លាំងក្លា​មុន​ពេល​ការ​ប្រកួត​មួយនេះ​ហើយ​ខ្ញុំ​ក៏​រៀប​ចំ​បាន​ល្អ​ និង​ អត់​មាន​ភ័យ​ព្រួយ​​អ្វី​ទេ​ពេល​ចូល​សង្វៀន។ វា​ជា​ពេលដ៏​រីករាយបំផុត»។ ​ ការ​បង្ហាញ​ខ្លួន​​ដំបូង​​នៅ​ The Home Of Martial Arts(ONE) ​បាន​ធ្វើ​ឲ្យ​ សុវណ្ណារី ក្លាយ​ជា​កីឡាការិនី​​ផ្ដួល​ដៃ​គូ​ឲ្យ​សន្លប់​ក្នុង​រយៈ​ពេល​លឿន​មួយ។

«វា​ជា​បទ​ពិសោធន៍​​ដ៏​អស្ចារ្យ​សម្រាប់ការ​រៀន​សូត្រ។ ​​ការ​​វាយ​តម្លៃ​ជា​ទូទៅ​​នា​ប្រកួត​ដំបូង​គឺ​ពិត​ជា​ល្អ​មែន​ទែន។ ​ការ​​ឡើង​​សង្វៀនប្រជុំដោយ​មនុស្ស​កុះករ​ ​នាំ​ឲ្យ​ខ្ញុំ​បាត់​​អៀន, លែង​ភ័យ និង​កាន់​តែ​មាន​អារម្មណ៍​ល្អ​និងទំនុកចិត្តទៅវិញ»។

កូន​សិស្ស​របស់លោក​ Justen Hamilton ​ ​បាន​​សង្កត់​ធ្ងន់​ថា ៖«​ខ្ញុំ​មិននឹក​ស្មាន​ថា​​នេះ​ជា​ការ​ប្រកួត​ដំបូង​នៅ​ទី​នេះ។ ​ហើយ​ខ្ញុំ​មិន​​មាន​ក្ដី​រំពឹង​ថា​ទទួល​បាន​​ការ​គាំទ្រ​ច្រើន​ពី​​ប្រទេស​កម្ពុជា​ដែរ ។ ខ្ញុំ​សូម​អរគុណ​ដល់​ក្ដី​ស្រលាញ់ និង​ការ​គាំទ្រនេះ»។

ឆ្នាំ​២០១៨ ​​ជា​​ឆ្នាំ​ដ៏​ចង​ចាំ​ក្នុង​ការ​បង្ហាញ​ខ្លួន​ដំបូង​​​ប្រកប​ដោយ​​​ជំនឿ​ចិត្ត​ សម្រាប់​ សុវណ្ណារី

ចុចអាន ចាន់ រតនា​ និងតារា​គុន​ចម្រុះ​មីយ៉ាន់ម៉ា​​ Phoe Thaw​ ជា​ទំនាក់ទំនង​មិន​


៣-ភាពខកចិត្តដំបូង

ជា​លើក​​ទី​១​កាល​​​ឆ្នាំ​២០១៩ ​អែម សុវណ្ណារី ​ដែល​ប្រកួត​តំណាង​ឲ្យ​កម្ពុជា​​ចាញ់​កីឡាការិនី​​សញ្ជាតិ​ប្រេស៊ីល​ Rayane Bastos ​ត្រឹម​ទឹក​ទី១​ ដោយ​សារ​ក្បាច់​​ឃ្លេ​​ក​ក្នុង​កម្មវិធី​ ​ ONE: MARK OF GREATNESS ​​កាល​ថ្ងៃ​ទី​ ៦​ ខែ​ ធ្នូ​ ​នៅ​ក្រុង​គូឡាឡាំពួរ​​នៃ​​ប្រទេស​ម៉ាឡេស៊ី។

​អែម សុវណ្ណារី​ ​​បាន​ថ្លែង​ថា​ ៖«​នេះ​ជា​បរាជ័យ​ដំបូង​ក្នុង​អាជីព​កម្រិត​ខ្ពស់​​របស់​ខ្ញុំ។​ ខ្ញុំ​សូម​សរសើរ​ដល់​ Rayane ​គេ​ពិត​ជា​ខ្លាំង​មែន​​ គេ​ធ្វើ​បាន​ល្អ​ណាស់​។ ​ប៉ុន្តែ​ខ្ញុំ​បាន​រៀន​សូត្រ​ច្រើន​អំពី​ការ​ប្រកួត​នេះ​​ និង ​យក​ទៅ​អភិវឌ្ឍ​ខ្លួន​ឲ្យ​ល្អ​​ប្រសើរ​ដើម្បី​ប្រកួត​​បន្តបន្ទាប់»។

ចុចអាន ពេល​ជួប​គ្នា​ អែម សុវណ្ណារី ​​ និយាយ​អ្វី​ខ្លះ​ចំពោះ​ ​ចាន់ រតនា!

គ្រា​នោះ​សុវណ្ណារី ​បាន​ដឹង​រួច​ហើយ​ថា ​​គូ​ប្រជែង​​ RAYANE ​មាន​កម្លាំង​ខ្លាំង ​និង ​ពូកែ​ខាង​ចំបាប់​​រួម​ទាំង​​ឃ្លេទៀតផង។ ​សុវណ្ណារី​ ​​បាន​ខំ​ប្រឹងប្រែង​ខ្លាំង​ដើម្បី​រើ​បម្រាស់​ ​ប៉ុន្តែ​បែរ​ជា​ត្រូវ​ចូល​​ក្បាច់​គាប​ដើម​ដៃ​របស់​ Rayane ​ទៅ​វិញ​​។ ​​ការ​ប្រកួត​​នៅ​ទឹក​ដំបូង​នេះ ​អែម សុវណ្ណារី ​បាន​ព្យាយាម​​ប្រើ​កណ្ដាប់​ដៃ​ ​និង​ ទាត់​ជើង​ដើម្បី​​ការពារ​ក្បាច់​ចាប់​​របស់​ Rayane។

ប៉ុន្តែ​​​ពេល​ដែល​ សុវណ្ណារី ​​ដើរ​ចូល​ចាប់​ជើង​បាន​សម្រេច​ក្នុង​គោល​ដៅ​​ដើម្បី​ផ្ដួល​​ ​កីឡាការិនី​​ប្រេស៊ីលបាន​ប្រើ​​ក្បាច់​ដៃ​ឃ្លេ​ក​​កីឡាការិនីមកពីអាមេរិក​ជាប់​មិន​ឲ្យ​រើ​រហូត​​​​ដួល​ទៅ​នឹង​ក្ដារ​រេញ។ ​ទោះ​ខំ​រើ​យ៉ាង​ណា​​ ក៏ សុវណ្ណារី ​មិន​អាច​គេច​ផុត​ពី​ក្រញាំ​ដៃ​របស់ ​កីឡាការិនី​វ័យ​ ២១ ​ឆ្នាំ​មក​ពី​ប្រេស៊ីល​ដែរ។ ទីបំផុត​ អែម សុវណ្ណារី ​ទះ​ដៃប្រាប់ដល់​គូ​ប្រជែង​ដើម្បី​សុំ​ចុះ​ចាញ់​ដោយ​សារ​តែ​ទ្រាំ​លែង​បាន​ត្រឹម​រយៈ​ពេល​ ២ ​នាទី​ និង ៤០ វិនាទី។ ​ Rayane ​ជា​ជើង​ខ្លាំង​មួយ​​ពោល​ជា​​​ម្ចាស់​ជើង​ឯក​​​៥​សម័យ​កាល​​ក្នុង​​កា​រ​ប្រកួត​ជើង​ឯក​​ជឺជិតស៊ូ​​នៅ​ស្រុក​កំណើត​​ និង​ មិន​ដែល​ស្គាល់​ពាក្យ​​ចាញ់​ក្នុង​ការ​ប្រកួត​អាជីព​ (ឈ្នះ ៤ និង​ ​​ស្មើ​១​ដង)។

សុវណ្ណារី​ សង្កត់​ធ្ងន់​ថា៖«​ខ្ញុំ​បាន​​​មើល​​វីដេអូ​លម្អិត​ ​និង​ វិភាគ​​សម្រាប់​បរាជ័យ​របស់​ខ្ញុំ​លើក​នេះ។ ​ខ្ញុំ​ត្រូវ​ការ​ពេល​វេលា​បន្ថែម​ទៀត​ដើម្បី​រៀន​សូត្រ​អំពី​​ការ​ប្រកួត​វាយ​ដាក់​ទ្រុង​បន្ត។ ​គម្រោង​របស់​​ខ្ញុំ​ គឺ​ចង់​បាន​ការ​ប្រកួត​ច្រើន​ទៀត​នៅ​ឆ្នាំ ​២០២០។ ​​ប៉ុន្តែ​ពេលនេះ ​​​ខ្ញុំ​ផ្ដោត​លើ​ការ​ហ្វឹកហាត់​ជាមុនសិន​ដោយ​សារ​ Covid-19 ​មិន​ទាន់​ចេញ​ទៅ​ប្រកួត​បានទេ»។​

ចុចអាន ខ្សែ​ជីវិត​របស់​កូន​ខ្មែរ​នៅ​អាមេរិក​​ អែម សុវណ្ណារី​ ឆ្លង​កាត់​រឿងរ៉ាវ​ជូរចត់​ក្នុង​ពិភព​ក្បាច់គុន

​ព័ត៌មាន​ផ្សេងៗ​​​អំពី​ ONE Championship​ សូម​ចូល​ទៅ​កាន់​ www.onefc.com/about-us, ​follow ​លើ​ Twitter​  ONEChampionship និង​ Instagram @ONEChampionship ​និង​ ​​ហ្វេសប៊ុក​ONEChampionship

មើល​​បន្ថែម

Stay in the know

Take ONE Championship wherever you go! Sign up now to gain access to latest news, unlock special offers and get first access to the best seats to our live events.
By submitting this form, you are agreeing to our collection, use and disclosure of your information under our Privacy Policy. You may unsubscribe from these communications at any time.