Kun Khmer

ចាន់ សំអាត មាន ឬក្រ ក៏មិនបន្ទោសគុនខ្មែរ

03/07/2020

អ្នកលេងគុនខ្មែរដែលធ្លាប់វ៉ៃនៅសង្វៀន ONE Championship ចាន់ សំអាត ក្នុងមួយជីវិតនេះមិនភ្លេចទេគុនខ្មែរ បើទោះជាជីវិតរស់នៅរបស់គេមានជីវភាព​ធូរធារ ឬក្រលំបាកយ៉ាងណាក៏ដោយ ហើយរូបគេនៅតែរក្សាគុនតម្លៃក្បាច់គុនប្រដាល់ខ្មែរជារៀងរហូត។

អ្នក​លេង​គុន​ខ្មែរ ចាន់ សំអាត

ចាន់ សំអាត បាននិយាយថា ៖«ទោះជាខ្ញុំមិនមែនជាកីឡាករល្បីជួរមុខ តែសម្រាប់គុនខ្មែរពិតជាមានន័យណាស់សម្រាប់ជីវិតខ្ញុំ។ ប្រដាល់បានផ្តល់ឲ្យខ្ញុំមានតម្លៃក្នុងសង្គម ផ្តល់ឲ្យខ្ញុំមានជីវភាពរស់នៅសមរម្យដូចគេឯង។ ប្រដាល់ជួយខ្ញុំមានសុខភាពល្អមាំមាំ។ ទោះជាខ្ញុំក្រ ឬមានគឺក្នុងកាលៈទេសៈណាក៏ដោយ ក៏ប្រដាល់គុនខ្មែរមានតម្លៃសម្រាប់ខ្ញុំបំផុត»។

«ទោះបាន​លុយ​តិចក្តី ច្រើនក្តីពីការប្រកួតគឺយើងត្រូវចេះសន្សំទុកដាក់។ ខ្ញុំនិងប្រពន្ធបានយកលុយទៅចងការគេដើម្បីទុកទៅថ្ងៃក្រោយ ក៏ដូចជាសន្សំប្រើប្រាស់ផ្សេងៗ។ ខ្ញុំមិនហ៊ានយកលុយពីប្រដាល់ទៅចាយសប្បាយហួសហេតុ ប្រើប្រាស់សម្ភារៈទំនើប ហឺហារទេ»។ នេះជាការលើកឡើងរបស់ ចាន់ សំអាត និងបានបញ្ជាក់ថា ទោះជារកចំណូលបានច្រើនយ៉ាងណាក៏ដោយ បើមិនចេះសន្សំទុកដាក់ទេគឺគ្មានសល់ទេ។

ចាន់ សំអាត (ឈរ)​ពេល​វ៉ៃ ONE Warrior Series

កីឡាករប្រដាល់ ចាន់ សំអាត បានប្រឡូកចូលក្នុងពិភពប្រដាល់រយៈពេលជាង១០ឆ្នាំហើយដែលធ្វើឲ្យរូបគេមានគំនិតភ្លឺស្វាង និងជីវិតរស់នៅក៏សមរម្យ ថ្វីបើរូបគេមិនមែនស្ថិតក្នុងចំណោមកីឡាករប្រដាល់ល្បីៗឈានមុខក៏ដោយ។

អ្នកលេងគុនខ្មែរអន្តរជាតិរូបនេះធ្លាប់មានមុខប្រកួតនៅសង្វៀនធំអន្តរជាតិ ONE Championship បាន៤ដងគឺឈ្នះ១ និងចាញ់៣ក្នុងនោះធ្លាប់ប្រកួតគុនចម្រុះបាន១ដង និងប្រកួតកម្មវិធី ONE Warrior Series បាន៣ដង។ ចំពោះការប្រកួតគុនខ្មែរវិញគឺឈ្នះ៨០ ចាញ់៣៨ និងស្មើ១២ដង៕

ព័ត៌មានផ្សេងៗ​​​អំពី​ ONE Championship​ សូមចូលទៅកាន់​ www.onefc.com/about-us, follow ​លើ​ Twitter​ និង​ Instagram @ONEChampionshipនិង ​​ហ្វេសប៊ុកONEChampionship

មើល​​បន្ថែម

Stay in the know

Take ONE Championship wherever you go! Sign up now to gain access to latest news, unlock special offers and get first access to the best seats to our live events.
By submitting this form, you are agreeing to our collection, use and disclosure of your information under our Privacy Policy. You may unsubscribe from these communications at any time.