Kun Khmer

កីឡាការិនី​ជម្រើស​ជាតិ​ វី ស្រីខួច​ ដាក់​គោល​ដៅ​​ទៅ​ថ្ងៃ​អនាគត​

វី ​ស្រីខួច​ ​ដែល​ជា​​ម្ចាស់​មេដាយ​សំរឹទ្ធ​​ផ្នែក​​​ប្រដាល់​សកល​​​នៅ​ស៊ីហ្គេម​ឆ្នាំ​២០១៩​​​មិន​ទាន់​គិតគូរ​រឿង​លាចាក​ពី​​អាជីព​ប្រដាល់​នៅ​ឡើយ​ទេ​នៅ​ថ្ងៃ​មុខ​ទោះ​ជា​ខ្លួន​កំពុង​ពពោះ​កូន​​ដំបូង​រយៈ​ពេល​៥​ ​ខែ​ បន្ទាប់​ពី​រៀបការ​​ហើយ​ក៏​ដោយ។

​យ៉ាង​​​ណា​​ក្ដី​ ​កីឡាការិនី​ដែល​​​មាន​បទ​ពិសោធន៍​​​នៅ​សង្វៀន ​ONE Championship ​រូប​នេះ​​​​​នឹង​ពិភាក្សា​ជា​មួយ​ស្វាមី​បន្ទាប់​ពី​សម្រាល​បុត្រ​​រួច​ និង ​កូន​ធំ​ល្មម​អាច​ចូល​មក​ប្រឡូក​នៅ​សង្វៀន​សាជាថ្មី។​ ស្រីខួច ​​ធ្លាប់​​ចុះ​កុង​ត្រា​ប្រកួត​នៅ​​​ធំ​បំផុត​​ក្នុង​ប្រវត្តិ​សាស្ត្រ​អាស៊ី​ ONE ​បាន​ចំនួន​ ​៣​ដង​ ​(ចាញ់​២​ឈ្នះ​១)។ ​​ក្រៅ​ពី​នោះ​គេ​​​​ធ្លាប់​ចេញ​ទៅ​​ប្រកួត​គុន​ចម្រុះ​​​នៅ​​ប្រទេស​​ថៃ​បាន​ម្ដង​​​ដែល​​ស្ពាយ​ជ័យជម្នះ​​មក​ផ្ទះ​វិញ​ពី​កីឡាការិនី​ថៃ​ Khadja Aiyada Verpoest។ ​

កីឡាការិនី​​ជើង​ឯក​គុនខ្មែរទម្ងន់ Flyweight ​​​បាន​ប្រាប់​ឲ្យ​ដឹង​ថា​ ៖«​ខ្ញុំ​នឹង​ពិគ្រោះ​យោបល់​ជា​មួយ​ប្ដី​របស់​ខ្ញុំ​​​បន្ទាប់​ពី​​សម្រាល​កូន​​រួចរាល់​​​​ដែល​ខ្ញុំ​អាច​វិល​មក​ការ​ប្រកួត​​វិញ​បាន​។ ​ព្រោះ​​ចិត្ត​របស់​ខ្ញុំ​នៅ​តែ​​ដក់​ស្រលាញ់​ និង​ ចង់​​​ឡើង​ប្រកួត​ដូច​មុន​ មិន​ថា​​ក្នុង​​ស្រុក​ ឬ​ ​អន្តរជាតិ​នោះ​ទេ»។

ចុចអាន កីឡាការិនី​ពហុ​ជំនាញ​ នៅ​ ស្រីពៅ​ ជម្នះ​សំដី​​អ្នក​ដទៃ​ រហូត​ទទួល​បានការ​កោត​សរសើរ

ការ​តាំង​ចិត្ត​​​ដ៏​​អង់អាច​​​​មួយ​​នេះ​​​​ព្រោះ​ពេល​ធំ​ដឹង​ក្តី​ក្នុង​វ័យ​ជាង​១០​ឆ្នាំ ​វី ស្រីខួច ​បាន​សម្រេច​ចិត្ត​ចូល​ហាត់​​ក្បាច់​គុន​​ជាមួយ​បង​ប្រុស​បង្កើត​ វី សាវុធ ​​អតីត​កីឡាករ​ប្រដាល់​​សកល​ល្បី​ឈ្មោះ​​នៅ​ក្លិប​ឥន្ទ្រី​កីឡា ​ដែល​មាន​គ្រូ​បង្វឹក​​លោក​ ​ដួង​ បូរី ​ មុន​ពេល​ផ្លាស់​ក្លិប​ និង​បន្ត​មក​​ហាត់​នៅ​ក្រុម​ជម្រើស​ជាតិ។​ ​​កាល​ហាត់​ដំបូង​ ក្លិប​ឥន្ទ្រី​កីឡា​នៅ​មិន​ឆ្ងាយ​ប៉ុន្មាន​ពី​ផ្ទះ​ជួល​របស់​គ្រួសារ​ ស្រីខួច ​​ស្ថិត​​នៅ​ ភូមិ​ព្រែក​សំរោង សង្កាត់​តាខ្មៅ ​ក្រុង​តាខ្មៅ ​ខេត្ត​កណ្តាល។ ​ការ​ឆ្លង​កាត់​ឧបសគ្គ​រាប់រយ​បែប​នេះ​ទើប​ធ្វើ​ឲ្យ​រូប​គេ​នៅ​ក្រាញននៀល​​មិន​​ចង់​ឲ្យ​បាត់បង់​ងាយៗ​ទេ។ ​​​​​



ប្អូន​ស្រី​របស់​ វី សាវុធ ​បាន​គូស​បញ្ជាក់​​ទៀត​ថា​ ៖«​វា​ជា​គំនិត​របស់​ខ្ញុំ​នៃ​​ការ​ចង់​​បន្ត​ ប៉ុន្តែ​គ្រួសារ​របស់​​ខ្ញុំ ​ផ្ដល់​យោបល់​ថា​ ​មិន​ដឹង​ជា​បន្ត​​អាជីព​ប្រដាល់​ធ្វើ​អី​ទៀត។ ​​​ទោះ​មិន​ទាន់​ច្បាស់​ ១០០%​ ​ប៉ុន្តែ​ខ្ញុំ​នៅ​តែ​ចង់​ឡើង​រេញ​វិញ។ ​មួយ​ទៀត​ ​បើ​សិន​មិន​​អាច​មាន​លទ្ធភាព​​ឡើង​រេញ​ ​​ក៏​ខ្ញុំ​​ស្រលាញ់​ការងារ​ជា​​មន្ត្រី​អាជ្ញា​កណ្ដាល ឬ ​ចៅ​ក្រម​ដែរ។ ​បើ​សិន​មាន​វគ្គ​បណ្ដុះបណ្ដាល​មន្ត្រី​អាជ្ញា​កណ្ដាល​ ឬ ​ចៅ​ក្រម​ ​នៅ​ក្រោម​​សហព័ន្ធ​ ​ខ្ញុំ​ចង់​ចូល​រៀន​និង​​មាន​បំណង​​ធ្វើ​ការងារ​ទាក់ទង​ប្រដាល់​ត​ទៅ​ទៀត»។

ស្រីខួច​ ​បន្ថែម​ទៀត​ថា​​ បើ​សិន​រូប​គេ​ចូល​ហ្វឹកហាត់​វិញ​នា​ថ្ងៃ​ខាង​មុខ​​ ​គឺ​នឹង​ហ្វឹកហាត់​ជា​មួយ​គ្រូ​បង្វឹក​ជម្រើស​ជាតិ​​​លោក​ វ៉ែន សុផល ​ឬ ​​លោក​ ជ័យ ណារ៉ា​ ​តែ​ម្ដង។ ​ ​



​វី ស្រីខួច​ ដែល​​មាន​វ័យ​​ ២៩ ​ឆ្នាំ​​ នា​ពេល​បច្ចុប្បន្ន​​នេះ​អាច​ប្រកួត​បាន​ទាំង​គុន​ចម្រុះ​, ​ប្រដាល់​សកល​ និង ​គុន​ខ្មែរ។ ​ស្រី​ខួច​​មាន​កំណត់​ត្រា​គុន​ចម្រុះ​៤ដង​​​ក្នុង​នោះ​​ឈ្នះ​២​ដង​ និង​ចាញ់​២​ដង។ ​ចំណែក​ ​ប្រដាល់​សកល​វិញ​​ប្រកួត​បាន​​ ៨​ដង​ ​ពោល​ ឈ្នះ​ ៧​ដង និង​ចាញ់​ ១​ដង។ រី​ឯ​គុន​ខ្មែរ​ ស្រីខួច ​ប្រកួត​បាន​ ១៨​ ដង​​​ដែល​ទទួល​បាន​​ជ័យជម្នះ​រហូត​ដល់​ ១៦ ដង​ និង​ ចាញ់​ ២ដង ប៉ុណ្ណោះ៕

ចុចអាន ខ្សែ​ជីវិត​របស់​កូន​ខ្មែរ​នៅ​អាមេរិក​​ អែម សុវណ្ណារី​ ឆ្លង​កាត់​រឿងរ៉ាវ​ជូរចត់​ក្នុង​

 

ព័ត៌មានផ្សេងៗ​​​អំពី​ ONE Championship​ សូមចូលទៅកាន់​ www.onefc.com/about-us, follow ​លើ​ Twitter​ និង​ Instagram @ONEChampionship ​និង ​​ហ្វេសប៊ុកONEChampionship