Kun Khmer

កីឡាករ​-កីឡាការិនី​​ បី​រូប​បង្ហាញ​ទស្សនៈ​ពេល​សង្វៀន​ ONE ​ត្រលប់​មក​វិញ

ONE Championship ​​​​​គ្រោង​ដំណើរ​ការ​កម្មវិធី​ប្រកួត​របស់​ខ្លួន​ឡើងវិញនា​​ថ្ងៃ​ទី ៣១​ ​កក្កដា ខាង​មុខ​នៅ​ក្រុង​បាងកក​ប្រទេស​ថៃ​​​ ដែល​គេ​ដាក់​ឈ្មោះ​ថា ​ONE: NO SURRENDER។ ​នេះ​ជា​កម្មវិធី​ដំបូង​​​គិត​ចាប់​តាំង​ពីវិបត្តិ​ Covid-19 ​ វាយ​លុក​ខ្លាំងក្លា​តាំង​ពី​ខែ​ ​​​មីនា​ មក។ ​ជា​មួយ​គ្នា​​​​នេះ​ កីឡាករ​ជាប់​កិច្ច​សន្យា​ដូច​ជា​​ ​​ចាន់ រតនា,​ ខុន ស៊ីចាន់ ​និង ​កីឡាការិនី​ ​អែម សុវណ្ណារី ​​បាន​បង្ហាញ​ទស្សនៈ​វិជ្ជមាន​នៃ​ការ​វិល​ត្រលប់​មក​​វិញ​របស់​សង្វៀន​ធំ​បំផុត​ក្នុង​ប្រវត្តិសាស្ត្រ​អាស៊ី​​ ​​មួយ​នេះ​​ដូច​ខាង​ក្រោម។ ​

«​ខ្ញុំ​ពិត​ជា​ត្រេក​អរ​ពេល​សង្វៀន ONE ​ត្រលប់​មក​វិញ​ក្នុង​​អំឡុង​វិបត្តិ​ Covid-19 ​នេះ។ ​ទោះ​មិន​ទាន់​​​ដល់​វេន​​ខ្ញុំ​វ៉ៃ​ ក៏​គង់​តែ​ដល់​នៅ​ពេល​ឆាប់​ដែរ​ៗ។ ​ទោះ​មិន​ទាន់​បាន​​ប្រកួត​ក៏​ខ្ញុំ​មាន​ឱកាស​​រៀប​​ចំ​ខ្លួន​បាន​ល្អ​ប្រសើរ​និងរង់ចាំ​ជា​និច្ច​ប្រកួត​តំណាង​ឲ្យ​កម្ពុជា»។ កំពូល​អ្នក​លេង​គុន​ចម្រុះ​ប្រចាំ​កម្ពុជា ​​ចាន់ រតនា​ ​បាន​បញ្ចេញ​ទស្សនៈ​​យ៉ាង​​ដូច្នេះ។ រតនា​ ខក​ខាន​ការ​ប្រកួត​នៅ​សង្វៀន ONE តាំង​ពី​ខែ​ សីហា​ ឆ្នាំ ២០១៩ ក្រោយ​ឈ្នះ​​​កីឡាករ​ខ្លាំង​ចំបាប់​មក​ពី​គុយបា Gustavo Balart ​នៅ​កម្មវិធី​ ONE:DREAM OF GOLDS។

​រី​ឯ​កីឡាករ​មក​ពី​បន្ទាយ​មាន​ជ័យ ​ខុន ស៊ីចាន់ ​​បាន​សម្ដែង​អារម្មណ៍​ថា​​ ៖«​ខ្ញុំ​សប្បាយ​ចិត្ត​មែន​ទែន ​ព្រោះ​ខ្ញុំ​អាច​​​ឡើង​ប្រកួត​ម្ដង​ ឬ ​ពីរ​ដង​ទៀត​នា​ពេល​ខាង​មុខ។ ​យ៉ាង​ណា​ពេល​នេះ​ គ្រូ​អត់​ទាន់​ប្រាប់​ទេ ​ប៉ុន្តែ​ខ្ញុំ​នៅ​ហ្វឹកហាត់​កម្លាំង​ ​​និង​បច្ចេកទេស​ខ្លះៗ​នៅ​ស្រុក​ដោយ​សារ​​​ខ្ញុំ​មាន​ការ​ប្រកួត​មួយៗ​ដែរ​នៅ​​សង្វៀន​ឯ​ភ្នំពេញ»។ ​ម្ចាស់​ខ្សែ​ក្រវាត់​ Khmer Warrior Challenge វគ្គ​ទី​១​ឆ្នាំ​២០១៣​ រូប​នេះ​​ឡើង​ប្រកួត​ចុង​ក្រោយ​ចាញ់​កីឡាករ​ ឥណ្ឌូណេស៊ី​ Eko Roni Saputra នៅ​កម្មវិធី ONE: Warrior’s Code ​កាល​ដើម​ខែ​​កុម្ភៈ ឆ្នាំ ២០២០។ ​

ចំណែក អែម ​សុវណ្ណារី ​​កូន​ខ្មែរ​កើត​នៅ​អាមេរិក​ ​និង​ជា​​កីឡាការិនី​ជាប់​កិច្ច​សន្យា​ផង​នោះ​​បាន​​​បង្ហើប​ទស្សនៈ​របស់​ខ្លួន​​ដូច្នេះ​ ៖«​ខ្ញុំ​អបអរ​សាទរ​ដែល ONE ​ត្រលប់​មក​វិញ។ ​តែ​​​នៅ​អាមេរិក​មិន​ទាន់​ធូរ​ស្រាល​ទេ ដូច្នេះ​ខ្ញុំ​​មិន​អាច​ចេញ​ទៅ​ណា ឬ ទៅ​ប្រកួត​កើត​ទេ​។ ​ប៉ុន្តែ​ ​ខ្ញុំ​​ឃើញថា​ ONE ​ប្រើ​កីឡាករ​ក្នុង​ស្រុក​ច្រើន​ជាង​បរទេស។  ខ្ញុំទន្ទឹងរង់ចាំទៅប្រកួត​តំណាង​ឲ្យ​ខ្មែរ​ជា​និច្ច​»។ ​ “The Sweet Savage”​ ​បាន​បញ្ជាក់​ថា​ អ្វី​ដែល​​ត្រូវ​ធ្វើ​​ចាំ​បាច់​​បំផុត​នា​ពេល​​នេះ​ គឺ​បន្ត​ការ​ហ្វឹកហាត់​​ដដែល​ និង​ ​​រៀន​ភាសា​ខ្មែរ​​តាម​អនឡាញ ​ហើយ​រង់ចាំ​​ការ​ហោះហើរ​ទៅ​ប្រកួត​នៅ​សង្វៀន​ ONE ជា​ថ្មី​នា​ពេល​ឆាប់ៗ​ខាង​មុខ។

ចុចអាន ខ្សែ​ជីវិត​របស់​កូន​ខ្មែរ​នៅ​អាមេរិក​​ អែម សុវណ្ណារី​ ឆ្លង​កាត់​រឿងរ៉ាវ​ជូរចត់​ក្នុង​ពិភព​ក្បាច់គុន



ចុចអាន ចាន់ សំអាត មាន ឬក្រ ក៏មិនបន្ទោសគុនខ្មែរ

ព័ត៌មាន​ផ្សេងៗ​​​អំពី​ ONE Championship​ សូម​ចូល​ទៅ​កាន់​ www.onefc.com/about-us, ​follow ​លើ​ Twitter​ និង​ Instagram @ONEChampionshipនិង​ ​​ហ្វេសប៊ុក​ONEChampionship