Kun Khmer

ក្លិប​របស់​ ចាន់ រតនា ​បើក​វិញ​​ តែ​​​មិន​អ៊ូអរ​ដូច​មុន

​ក្លិប​ «សិល្បៈ»​ ​ដែល​​មាន​ ចាន់ រតនា​ ជា​​ម្ចាស់​​ត្រូវ​បាន​បើក​ឲ្យ​ដំណើរ​ការ​ហ្វឹកហាត់​​រយៈ​ពេល​ប្រមាណ​មួយ​ខែ​មក​ហើយ។ ​ក្លិប​​ «សិល្បៈ»​ ​​​ត្រូវ​បាន​បិទ​ទ្វារ​​តាំង​ពី​ខែ​ មីនា ​​​មក​ម៉្លេះ​ដោយ​សារ​តែ​​ការ​​ផ្ទុះ​ឡើង​នៃ​មេរោគ​ផ្លូវ​ដង្ហើម​ថ្មី Covid-19។ ​

​​អ្នក​លេង​គុន​ចម្រុះ​កំពូល​ប្រចាំ​កម្ពុជា​​ និង​ជា​ម្ចាស់​ក្លិប​«សិល្បៈ»​ បាន​​រៀបរាប់​ថា៖«​ខ្ញុំ​បាន​បើក​ក្លិប​របស់​ខ្ញុំ​វិញរយៈ​ពេល​​ប្រហែល​មួយ​ខែ​មក​ហើយ​ ប៉ុន្តែ ​អ្នក​ចូល​ហាត់​មិន​ច្រើន​ដូច​មុន​ទេ។​ ​ហើយ​ខ្ញុំ​ក៏​មិន​បង្ហាត់​ច្រើន​ប៉ុន្មាន​ដែរ​។ ​ខ្ញុំ​​បាន​បន្ថយ​ម៉ោង​ហ្វឹកហាត់​ព្រោះ​ខ្ញុំ​ត្រូវ​​ទុក​ពេល​ហ្វឹកហាត់​ខ្លួន​ឯង​ច្រើន។ ចំណែក​កូន​សិស្ស​វិញ​​ភាគ​ច្រើន​គឺ​​បរទេស​​​នៅ​ស្រុក​ខ្មែរ​ និង​ ​អ្នក​មាន​ទីតាំង​ស្ថិត​នៅ​ក្បែរ​ក្លិប»។ ​​

ចុចអាន ចាន់ ​រតនា ​​ប៉ង​ជួប​​​​ Yuya Wakamatsu​ ​​ដើម្បី​​​បង្កើន​សមត្ថភាព​ដល់​​កម្រិត​ខ្ពស់

ក្លិប​ «សិល្បៈ»​ ​​របស់​ ចាន់ រតនា ​​បាន​ប្ដូរ​និង​​ជួល​​​ទីតាំង​ថ្មី​​នា​​​ចុង​ឆ្នាំ​២០១៩​នៅ​ ផ្ទះ​លេខ​​១០៩​ ​ផ្លូវ​​ ១៣ BT ​​សង្កាត់​បឹង​ទំពន់​១​ខណ្ឌ​មាន​ជ័យ​ រាជធានី​ភ្នំពេញ ​(ទល់​​មុខ​នឹង​ Phnom Penh Sports Club ​ផ្លូវ​​២៧១)។​ ទី​តាំង​​​ក្លិប​ចាស់​​ដែល​បាន​បម្រើ​​ការ​ហ្វឹកហាត់​រយៈ​ពេល​​៣​ឆ្នាំ​មក​​នោះ​ ​​ស្ថិត​នៅ​ក្បែរ​ សារ​មន្ទីរ​ឧក្រិដ្ឋ​កម្ម​ប្រល័យ​ពូជ​សាសន៍​ទួល​ស្លែង​​​។

កីឡាករ​វ័យ​៣៤​ឆ្នាំ​សង្កត់​ធ្ងន់​ថា ៖«​កូន​សិស្ស​នា​ពេល​នេះ​ គឺ​ស្គាល់​ប្រវត្តិ​ធ្វើ​ដំណើរ​ និង​​ស្នាក់​នៅ​ស្រុក​ខ្មែរ។ ​ហើយ​មុន​ពេល​ហ្វឹកហាត់​ម្នាក់ៗ​សុទ្ធ​តែ​មាន​អនាម័យ​ខ្ពស់​ដើម្បី​បង្ការ​ជំងឺ​ឆ្លង​ Covid-19»។

​ក្រៅ​ពី​បង្ហាត់​កូន​សិស្ស​​​​ឲ្យ​រឹង​មាំ​ផ្នែក​សុខភាព​ ​អ្នក​​លេង​គុន​ខ្មែរ​​​និង​យុទ្ធ​គុនខម​​បាន​ឆ្លៀត​ពេល​ហ្វឹកហាត់​ខ្លួន​​ឯង​ជា​មួយ​គ្រូ​បង្វឹក​​តាម​ជំនាញ​ដូច​ជា​​លោក​ Lorenzo ​ផ្នែក​កម្លាំង, លោក ខូវ វិឌ្ឍនា ផ្នែក​ក្បាច់​ជឺជិតស៊ូ និង​ គ្រូ​ Rolando ផ្នែក​ប្រដាល់​សកល។

​​ពី​មុន​ ក្លិប​ «សិល្បៈ» ​​មាន​កីឡាករ​​​អាជីព​​មួយ​ចំនួន​ដែល​បង្វឹក​​ដោយ​ចាន់ រតនា ​ប៉ុន្តែ ​មួយ​រយៈ​ចុង​ក្រោយ​នេះ​​​​មានតែ​កូន​សិស្ស​ហាត់​​សម្រាប់​​សុខភាព​ល្អ​ប៉ុណ្ណោះ​ ជា​ពិសេស​ជន​បរទេស​ ដែល​ស្គាល់​តាម​រយៈ​ប្រពន្ធ​​សញ្ជាតិ​បារាំង​របស់​ខ្លួន។ ​​កូន​សិស្ស​ហាត់​ចង់​ឡើង​វ៉ៃ​​អាជីព​មួយ​ចំនួន​បាន​ងាក​ទៅ​ស្រវា​រក​ការងារ​ខុស​ពី​ប្រដាល់​វិញ។ ​ ​ការ​ហ្វឹកហាត់​​បំប៉ន​សុខភាព​​នា​ពេល​បច្ចុប្បន្ន​នេះ​អាស្រ័យ​លើ​ការ​រៀប​ចំ​របស់ ​រតនា​ ​​ព្រោះ​​រូប​​​គេ​រវល់​សម្រួច​ខ្លួន​ឲ្យ​ខ្លាំង​ដែរ​​​ក្នុង​ដំណើរ​ត្រៀម​ខ្លួន​ជា​ថ្មី​ឡើង​សង្វៀន ONE Championship។

​រតនា​ ​មាន​កំណត់​ត្រា​ចំនួន​១០​​ដង​ក្នុង​សង្វៀន​គុន​ចម្រុះ​​​តាំង​​ពី​ឆ្នាំ​ ២០១៥​មក ​ពោល​​ឈ្នះ​ ៧ ​ដង​ និង ​ចាញ់​ ៣​ដង។ ​​​​​រតនា ​អាច​នឹង​ជួប​ជើង​ខ្លាំង​មក​ពី​ជប៉ុន​​ Yuya Wakamatsu ឬ ​រហស្ស​នាម​ថា​ “Little Piranha” នា​ថ្ងៃ​​មុខ​​នៅ​សង្វៀន ONE និង​ជា​ការ​ប៉ង​យក​​ជ័យជម្នះ​ ៤ លើក​ជាប់​គ្នា​នៅ​សង្វៀន​ពិភព​​លោក​មួយ​នេះ។ ​កីឡាករ​ជប៉ុន​រូប​នេះ​បង្ហាញ​ការ​​ប្រកួត​ដ៏​អស្ចារ្យ​​ ​និង​ ​​ផ្ដួល​ដៃ​គូ​ឲ្យ​សន្លប់​ជា​ហូរហែ​ ​ហើយ​ក៏​​ជា​បេក្ខភាព​ដណ្ដើម​ខ្សែ​ក្រវាត់​ទៀត​ផង​នៅ​ឆ្នាំ​ ២០១៩​ កន្លង​ទៅ។ ​

បើ​សិន​ចង់​ហ្វឹកហាត់​​ជា​មួយ​ ចាន់ រតនា​ ​សូម​ទាក់ទង​លេខ​ទូរសព្ទ​ផ្ទាល់​ខ្លួន​របស់​​គេ​​​​ ​០៩២​ ៣៤៥ ៤៣៩៕ ​

ចុចអាន ពេល​ជួប​គ្នា​ អែម សុវណ្ណារី ​​ និយាយ​អ្វី​ខ្លះ​ចំពោះ​ ​ចាន់ រតនា!

មើល​​បន្ថែម

Stay in the know

Take ONE Championship wherever you go! Sign up now to gain access to latest news, unlock special offers and get first access to the best seats to our live events.
By submitting this form, you are agreeing to our collection, use and disclosure of your information under our Privacy Policy. You may unsubscribe from these communications at any time.