Kickboxing

ឡៅ ចិត្រា​ ត្រូវ​បាន​កោះ​ហៅ​ចូល​​ជម្រើស​ជាតិ​

22/07/2020

កីឡាករ​ប្រដាល់​គុន​ខ្មែរ​ និង​ ONE Championship ឡៅ ចិត្រា​ ដែល​​បាន​របួស​ស្រាំ​​ម្រាម​ដៃ​ប៉ុន្មាន​ខែ​កន្លង​ទៅ​ហើយ​ត្រូវ​បាន​កោះ​ហៅ​ចូល​ក្រុម​ជម្រើស​ជាតិ​កម្ពុជា​ដើម្បី​ប្រមូល​ម្តុំ​ហ្វឹកហាត់​ត្រៀម​ការ​ប្រកួត​ព្រឹត្តិការណ៍​អន្តរជាតិ។

ឡៅ ចិត្រា (ស្តាំ) ចាញ់ Superlek

ព្រឹត្តិការណ៍​កីឡា​ស៊ីហ្គេម​ឆ្នាំ​២០២១​នឹង​រៀប​ចំ​នៅ​ប្រទេស​វៀតណាម​ដែល​ជា​ម្ចាស់​ផ្ទះ​ ខណៈ​ប្រទេស​នីមួយ​ៗ​នៅ​អាស៊ាន​ក៏​កំពុង​ត្រៀម​ខ្លួន​ដើម្បី​ចូល​រួម​ប្រកួត​ ក្នុង​នោះ​កម្ពុជា​ក៏​ជា​ប្រទេស​មួយ​ដែល​បាន​កោះ​ហៅ​កីឡាករ កីឡា​ការិនី​ហ្វឹកហាត់​ផង​ដែរ​ក្នុង​អន្តរកាល​នៃ​ជំងឺ​ខូវិត-១៩។

ក្នុង​ការ​កោះ​ហៅ​ប្រភេទ​កីឡា​សំខាន់​ និង​មាន​សក្កានុពល​ឲ្យ​ប្រមូល​​ផ្ដុំត្រៀម​ស៊ីហ្គេម​នា​ពេល​ខាង​មុខ​នេះ​ក៏​មាន​កីឡា​ប្រដាល់​គុន​ខ្មែរ​ដែរ។  ដូច្នេះ​ហើយ​ទើប​បាន​ជា​អ្នក​លេង​គុន​ខ្មែរ ឡៅ ចិត្រា ត្រូវ​បាន​កោះ​ហៅ​ចូល​ហ្វឹកហាត់​ជា​មួយ​ក្រុម​ជម្រើស​ជាតិ​ផង​ដែរ។

លោក​ ឡៅ​ ស៊ីណាត​ បង​ប្រុង​បង្កើត​របស់​ ឡៅ ចិត្រា​ បាន​ឲ្យ​ដឹង​ថា ប្អូន​ប្រុស​របស់​លោក​បាន​ទៅ​ហ្វឹកហាត់​ជា​មួយ​ក្រុមជម្រើស​ជាតិ​​ប្រដាល់​គុន​ខ្មែរ​មួយ​រយៈ​ពេល​ហើយ។  ការ​ហ្វឹកហាត់​នេះ​នៅ​មិន​ទាន់​​ខំ​ប្រឹង​ខ្លាំង​ពេញលេញ​ទេ​​ ពី​ព្រោះ​​របួសស្រាំ​ម្រាម​ដៃ​របស់​គេ​នៅ​មិន​ទាន់​ជា​សះ​ស្បើយ​១០០​%​ឡើយ។

ឡៅ ចិត្រា (ស្តាំ) និង Superlek (ឆ្វេង)

«របួស​ស្រាំ​ម្រាម​ដៃ​​របស់​ ចិត្រា​ មិន​ទាន់ជា​សះ​ស្បើយ​១០០​%​ទេ។ គេ​នៅ​ថ្នម​ដៃ​ក្នុង​ការ​ហ្វឹក​ហាត់ ហើយ​រឿង​​ឡើង​វ៉ៃ​គុន​ខ្មែរ​វិញ​គឺ​យ៉ាង​ហោច​ណាស់​ក៏​ត្រូវ​ចំណាយ​ពេល​១​ខែ​ទៀត​ដែរ​ទើប​អាច​វ៉ៃ​បាន»។ នេះ​ការ​បញ្ជាក់​របស់​លោក​ ឡៅ ស៊ីណាត។
________________________________________________________________________________

________________________________________________________________________________
ឡៅ ចិត្រា បាន​​របួស​ស្រាំ​ម្រាម​ដៃ​​កាល​ពី​ថ្ងៃ​ទី​២៥​ ខែ​មេសា ឆ្នាំ​២០២០​នៅ​ពេល​ប្រកួត​ជា​មួយ​ មឿន សុខហ៊ុច។ បន្ទាប់​ពី​ព្យាបាល​ប្រហែល​ជា​៣​ខែ​ រូប​គេ​ត្រូវ​មាន​ឈ្មោះ​ឡើង​ប្រកួត​ ប៉ុន្តែ​ការ​ហ្វឹកហាត់​បាន​ធ្វើ​ឲ្យ​របួស​ស្រាំ​ម្រាម​ដៃ​​​រើស​ហើម​ឈឺ​ឡើង​វិញ​ដែល​ធ្វើ​ឲ្យ​រូប​គេ​លុប​ចោល​ការ​ប្រកួត​នោះ។

អ្នក​លេង​គុន​ខ្មែរ​រូប​នេះ​ជា​កីឡាករ​ប្រដាល់​គុន​ខ្មែរ​កម្ពុជា​ម្នាក់​ក្នុង​ចំណោម​កីឡាករ​គុន​ខ្មែរ​៣​នាក់​​ដែល​បាន​វ៉ៃ​​គុន​ខ្មែរ​នៅ​ស្ថាប័ន​ ONE Championship ប៉ុន្តែ​ការ​ប្រកួត​លើក​ទី​១​នោះ​រូបបាន​ចាញ់​ពិន្ទុ​កីឡាករ​ថៃ​ Superlek ក្នុង​ព្រឹត្តិការណ៍ ONE : Clash OF​Legends នៅ​ប្រទេស​ថៃ។ រូប​គេ​នៅ​តែ​ចិញ្ចឹម​ចិត្ត​ទៅ​ប្រកួត​នៅ​សង្វៀន​កំពូល​លំដាប់​ពិភព​លោក​នេះ​ទៀត​ដើម្បី​សាង​កំណត់​ត្រា​ជ័យជម្នះ។

ឡៅ​ ចិត្រា​ ជា​ជើង​ឯក​គុន​ខ្មែរពិភព​លោក​​កម្រិត​មាស​នៅ​សង្វៀន​ PNN​ កាល​ពី​ឆ្នាំ​២០១៩​ និង​ឈ្នះ​មេដាយ​សំរឹទ្ធ​ក្នុង​ប្រភេទ​កីឡា​ឃីកបុកសីង​ក្នុង​ព្រឹត្តិការណ៍​កីឡា​ស៊ីហ្គេម​ឆ្នាំ​២០១៩​នៅ​ប្រទេស​ហ្វីលីពីន៕