Features

កីឡាការិនី​ពហុ​ជំនាញ​ នៅ​ ស្រីពៅ​ ជម្នះ​សំដី​​អ្នក​ដទៃ​ រហូត​ទទួល​បានការ​កោត​សរសើរ

03/07/2020

មុន​ពេល​ផ្តល់​ឲ្យ​ក្រុម​គ្រួសារ​មាន​មោទកភាព​ និង​ការ​កោត​សរសើរ​ពី​អ្នក​ដទៃ​ស្ទើរ​ទូទាំង​តាម​រយៈ​ជ័យជម្នះ​លើ​ឆាក​អន្តរជាតិ​នៃ​សង្វៀន​ធំ​លំដាប់​ពិភពលោក ​ONE Championship​ នៅ​ ស្រីពៅ​ បាន​ទទួល​រង​ពាក្យ​សំដីមើល​ស្រាល​ មិន​ឲ្យ​តម្លៃ​ក្នុង​នាម​ជាស្ត្រី​ភេ​ទ​​ដែល​ប្រឡូក​ចូល​ក្នុង​អាជីព។

ក្នុង​គ្រួសារ​ដែល​មាន​​បង​ប្អូន​បង្កើត​៨​នាក់​ (ស្រី៦​ និង​ប្រុស​២) នៅ​ ស្រីពៅ​ កើត​ថ្ងៃ​ទី​​១​ ខែ​ធ្នូ​ ឆ្នាំ​១៩៩៥​ នៅ​ភូមិ​ជើង​ឯក​ សង្កាត់​ជើង​ឯក​ ខណ្ឌ​ដង្កោ​ រាជធានី​ភ្នំពេញ​ ប្រទេស​កម្ពុជា​ដែល​មាន​ឪពុក​ឈ្មោះ​ គង់​ នៅ​ និង​ម្តាយ​ឈ្មោះ​ គឹម​ សយ។ ជីវភាព​គ្រួសារ​ពឹង​លើ​ការ​ធ្វើ​ស្រែ​ចម្ការ​ និង​ម្តាយ​លក់​ត្រី​។

Nou Srey Pov beats Rika Ishige

កីឡាការិនី នៅ​ ស្រីពៅ ពេល​ឈ្នះ​កីឡាការិនី Rika

ពី​កម្មការិនី​រោង​ចក្រ​កាត់ដេរ​ក្លាយ​ជា​អ្នក​ប្រដាល់​

នៅ​ ស្រីពៅ​ ជា​ក្មេង​ស្រី​ដែល​ស្អប់​ខ្ពើម​នឹង​ការ​ស្តី​បន្ទោស​ពី​អ្នក​ដទៃ​តាំង​ពី​តូច​ និង​ចង់​ធ្វើ​អ្វី​ដែល​ជា​ចំណង់​ចំណូលចិ​ត្ត​របស់​ខ្លួន​ឯង។ ក្រោយ​ពេល​ឈប់​រៀន​ត្រឹម​ថ្នាក់​ទី​៩​ នៅ​ ស្រីពៅ​ បាន​ចូល​ធ្វើ​ការ​ជា​កម្មការិនី​រោង​ចក្រ​កាត់​ដេរ​ដើម្បី​រក​ចំណូល​ជួយ​គ្រួសារ។ ស្រីពៅ​ រំលឹក​ថា​ ៖«ពេល​ខ្ញុំ​ធ្វើ​ការ​នៅ​រោង​ចក្រ​កាត់ដេរ​ ខ្ញុំ​ត្រូវ​បាន​គេ​ស្តី​បន្ទោស​ជា​ច្រើន​លើក។ ខ្ញុំ​ពិត​ជាឈឺ​ចាប់។ ខ្ញុំ​មិន​ចង់​ឮ​ពាក្យ​បែប​នោះ​ទេ។ ខ្ញុំ​ធ្វើ​ការ​នៅ​រោង​ចក្រ​បាន​ជាង​មួយ​ឆ្នាំ​ក៏​បាន​ឈប់»។

ពេលកញ្ញាបានចាកចេញពីការងារនៅរោង​ចក្រ​កាត់​ដេរ កញ្ញា​បាន​ចាប់​អារម្មណ៍​នឹង​កីឡា​ប្រដាល់​ដោយសារ​លោក​ឪពុក​ជា​អ្នក​បង្ហាត់​ប្រដាល់ ​ប៉ុន្តែ​ម្តាយ​បាន​ជំទាស់។ «ខ្ញុំ​ចូល​ចិត្ត​ប្រដាល់​តាំង​ពី​តូច​ អីចឹង​ខ្ញុំ​សុំ​ប៉ាម៉ាក់​ហាត់​ប្រដាល់​ តែ​ម៉ាក់​មិន​ព្រម។ ខ្ញុំ​បាន​អង្វរ​ម៉ាក់​ ហើយ​គាត់​ក៏​បាន​យល់​ព្រម។ ខ្ញុំ​បាន​តាំង​ចិត្ត​ថា​ ត្រូវ​តែ​ចាប់​អាជីព​នេះ​ឲ្យ​ពិត​ប្រាកដ»។ នៅ​ ស្រីពៅ​ បាន​ប្រាប់​ក្រុម​ការងារ​ ONE Championship។

ជម្នះ​សំដី​អ្នក​ដទៃ​រហូត​ទទួល​បាន​ការ​កោត​សរសើរ

ពេល​ទទួល​បាន​ការ​យល់​ព្រម​ពី​អ្នក​មាន​គុណ​ឲ្យ​ចូល​ប្រឡូក​ប្រដាល់​ នៅ ស្រីពៅ​ បាន​ឮ​ផ្ទាល់​ត្រចៀក​ផ្ទាល់​ដែល​និយាយ​ពី​ស្ត្រី​ភេទ​មិន​គួរ​ធ្វើ​ជា​អ្នក​ប្រដាល់​ និង​មើល​មិន​ឃើញ​ពី​តម្លៃ​សម្រាប់​ស្ត្រី​ផ្នែក​ជំនាញ​វ៉ៃ​តប់។

យ៉ាង​ណា នៅ ស្រីពៅ បាន​យក​ប្តេជ្ញា​យក​ឈ្នះ​សំ​ដី​ទាំង​នោះ​ពី​អ្នក​ដទៃ​ឲ្យ​បាន។ អ្នក​លេង​គុន​ខ្មែរ​វ័យ​២៥​ឆ្នាំ​បាន​និយាយ​ថា​ ៖​«​ខ្ញុំ​បាន​តាំង​ចិត្ត​ថា​ ខ្ញុំ​ត្រូវ​តែ​ធ្វើ​ឲ្យ​បាន​ហើយ​ត្រូវ​យក​ឈ្នះ​អ្នក​មិន​ឲ្យ​តម្លៃ​ទាំង​នោះ»។ ព្រម​ដោយ​ចំណង់​ចំណូល​ចិត្ត​ និង​ប្តេជ្ញា​យក​ឈ្នះ​ចិត្ត​អ្នក​ដទៃ​ផង​នោះ​ នៅ​ ស្រីពៅ​ បាន​ខិត​ខំ​ហ្វឹកហាត់​ទាំង​យប់​-​ថ្ងៃ​ដោយ​មិន​គិត​ពី​ការ​នឿយហត់។ កញ្ញា​បាន​ហ្វឹក​ហាត់​ជា​មួយ​លោក​គ្រូ​ ម៉ាក ​សាខន​ នៅ​ក្លឹប​តាឡីដំរីមានរិទ្ធិ មួយ​រយៈ​ពេល​ខ្លី​ប៉ុណ្ណោះ​ក៏​ឆាប់​ចេះ​ចាំ​ យល់​ និង​ចាប់បាន​លឿន​ពី​អ្វី​ដែល​គ្រូ​បាន​បង្ហាត់​បង្រៀន។

នៅ ស្រីពៅ (ឈរ) ពេល​វ៉ៃ​ជាមួយ Rika (ដេក)

ស្រីពៅ​ បាន​​ឲ្យ​ដឹង​ថា ៖​«​ខ្ញុំហ្វឹក​ហាត់​ប្រដាល់​បាន​ប្រហែល​​មួយ​ខែ​ប៉ុណ្ណោះ​ លោក​គ្រូ​បាន​ចាប់​ឲ្យ​ខ្ញុំ​ឡើងវ៉ៃ​។​ ពេល​ឡើង​វ៉ៃ ​ខ្ញុំ​ទទួល​បាន​ជ័យជម្នះ ជា​​បន្ត​​បន្ទាប់​​រហូត​​បាន​​វ៉ៃ​​អន្តរជាតិ​ទាំង​ក្នុង​ និង​ក្រៅ​ប្រទេស។ ជា​ពិសេស​ខ្ញុំ​បាន​ចេញ​ទៅ​ប្រកួត​នៅ​ក្រៅ​ប្រទេស​ជា​ច្រើន​លើក។ ពេល​ខ្ញុំ​ប្រកួត​ឈ្នះ​ខ្សែក្រវាត់ ​ឈ្នះ​មេដាយ​មាស​ងថ្នាក់​ជាតិ​ និង​ឈ្នះការ​ប្រកួត​នៅ​ក្រៅ​ប្រទេស​ ប៉ាម៉ាក់​របស់​ខ្ញុំ​ពិត​ជា​សប្បាយ​ចិត្ត​ណាស់។ ពិសេស​ម៉ាក់​របស់​ខ្ញុំ​មាន​មោទកភាព​ចំពោះ​ខ្ញុំ។ ជាង​នេះ​ទៀត​នោះ អ្នក​ដ​ទៃ​លែង​មើល​ស្រាល​ខ្ញុំ និង​បាន​កោត​សរសើរ​ខ្ញុំ​គ្រប់​ៗ​គ្នា»។ បន្ទាប់​មកកីឡា​ការិនី​រូប​នេះ​ហាត់​នៅ​ក្លឹប Cambodia Top Team ដើ់ម្បី​ចេញ​ទៅ​ប្រកួត​លើ​ឆាក​អន្តរជាតិ។

ឪពុក​​មាន​​ជំងឺ​​ប្រចាំ​​កាយ​

កីឡាការិនី​ជំនាញ​ច្រើន​ នៅ​ ស្រីពៅ​ បាន​​ប្រាប់​ថា​ លោក​ឪពុក​ គង់​ នៅ​ បាន​ធ្លាក់​ខ្លួន​ឈឺ​ជា​ច្រើន​ឆ្នាំ​មក​ហើយ។ សព្វ​ថ្ងៃ​នេះ​លោក​មាន​អាយុ​៦១​ឆ្នាំ​ដោយ​មាន​ជំងឺ​ដាច់​សរសៃ​ឈាម​ក្នុង​ក្រពះ​ និង​មាន​ជំងឺ​បំពង​ក​ស្តើង​ថែម​ទៀត​ដែល​មាន​តាំង​ពី​មុន​ពេល​​កញ្ញា​​បាន​ក្លាយ​ជា​អ្នក​ប្រដាល់​មក​ម្ល៉េះ។ កញ្ញា​បាន​ប្រាប់​ថា​ ពេល​ខ្លះ​លោក​ឪពុក​មាន​អាការៈ​ធ្វើ​ទុក្ខ​ខ្លាំង​ត្រូវ​ចំណាយ​លុយ​រាប់​ពាន់​ដុល្លារ​ដើម្បី​ព្យាបាល។ ជំងឺ​បែប​នេះ​នឹង​កើត​មាន​អាការៈ​ធ្ងន់ធ្ងរ​ភ្លាម​ៗ​ ប្រសិន​បើ​មិនប្រឹង​ប្រយ័ត្ន​ជា​ប្រចាំ។

នៅ ស្រីពៅ ជាមួយ​ប៉ាម៉ាក់របស់​នាង (រូបភាព​ផ្តល់​ឲ្យ)

ស្រីពៅ​ បាន​និយាយ​ថា ៖«មួយ​រយៈ​ពេល​ចុង​ក្រោយ​នេះ​ ត្រូវ​យក​ប៉ា​ទៅ​ពិនិត្យ​តាម​ដាន​សុខភាព​នៅ​មន្ទីរ​ពេទ្យ​ជា​រៀង​រាល់​ខែ​ ពីព្រោះ​បើ​មិន​ទៅ​ពិនិត្យ​ព្យាបាល​រាល់​ខែ​ទេ​ អាចបណ្តាល​ឲ្យ​ក្អួត​ចេញ​ឈាម។ រាល់​ខែ​នេះ​​ ​ទៅ​ពេទ្យ​ម្តង​ៗ​គឺ​ត្រូវ​ចំណាយ​យ៉ាង​ហោច​ណាស់២០០​ដុល្លារ»។

ចំណែក​ ម្តាយ​របស់​កីឡាការិនី​រូប​នេះ​ក៏​មាន​សុខភាព​មិន​សូវ​ល្អ​ប្រសើ​ដែរ។ ស្ថិត​ក្នុង​វ័យ​៥៩​ឆ្នាំ​ អ្នក​ស្រី​ គឹម​ សយ​ មាន​សុខភាព​ទ្រុឌ​ទ្រោម​ដោយ​នៅ​តែ​ផ្ទះ​មើល​ថែ​ចៅ​ និង​មិន​អាច​ធ្វើ​ការងារ​អ្វី​ធ្ងន់​បាន​ឡើយ។

ជាប់​ជម្រើស​ជាតិ

បន្ទាប់​ពី​ចូល​ប្រឡូក​ក្នុង​អាជីព​ប្រដាល់​តែ​ប្រហែល​ជា​២​ឆ្នាំ​ប៉ុណ្ណោះ​ នៅ​ ស្រីពៅ​ បាន​ជាប់​ជម្រើស​ជាតិ​ផ្នែក​កីឡាប្រដាល់​សកល​​​ពី​ឆ្នាំ​២០១៨​រហូត​ដល់​បច្ចុប្បន្ន​ ប៉ុន្តែ​បើ​និយាយ​ពី​ជំនាញ​គឺ​កញ្ញា​ចេះ​ច្រើន​មាន​ គុន​ខ្មែរ​ គុន​ចម្រុះ​ ប្រដាល់​សកល​ និងឃីក​បុកសីង។​ កញ្ញា​ឈ្នះ​បាន​មេដាយ​សំរឹទ្ធ​ ពី​ព្រឹត្តិការណ៍​កីឡា​ស៊ីហ្គេម​ ឆ្នាំ​២០១៩​ នៅ​ប្រទេសហ្វីលីពីន​ និង​បាន​ចេញ​ទៅ​ប្រកួត​នៅ​ក្រៅ​ប្រទេស​ជា​ច្រើន​ ​ដូច​ជា​នៅ​ប្រទេស​វៀតណាម​ក្នុង​ឆ្នាំ២០១៨​ នៅ​ប្រទេស​ ថៃ​ មីយ៉ាន់ម៉ា​ ឥណ្ឌូណេស៊ី​ និង​ហ្វឹកហាត់​នៅ​ប្រទេស​ជប៉ុន។

នៅ ស្រីពៅ (កណ្តាល​ពាក់​វែន​តា) ជាមួយ​ក្រុម​ជម្រើស​ជាតិ​កម្ពុជា (រូប​ភាពផ្តល់​ឲ្យ)

​កេរ្តិ៍​ឈ្មោះ​ល្បី​ល្បាញ​លើ​ឆាក​អន្តរជាតិ

ជាមួយ​នឹង​បទ​ពិសោធ​លើ​សង្វៀន​៦៥​ដង​ (ឈ្នះ​៤៥​ដង ចាញ់​១៧​ដង និង​ស្មើ ៤​ដង) នៅ​ ស្រីពៅ​ បាន​ប្រឡូក​ក្នុង​​អាជីព​​ប្រដាល់​ប្រហែល​​​ជា​​៥​ឆ្នាំ​​ហើយ។ ក្នុង​​រយៈ​​ពេល​នេះ​ការ​ប្រកួត​នៅ​លើ​ឆាក​អន្តរ​ជាតិ​គឺ​ជា​ជោគជ័​យ​ធំ​ធេង​​ សម្រាប់​ខ្លួន​ឯង​ គ្រួសារ​ និង​ប្រទេស​ជាតិ។

ស្រីពៅ​ បាននិយាយ​ថា​ ៖«ខ្ញុំ​មិន​នឹក​ស្មាន​ថា​ ខ្លួន​ឯង​ធ្វើ​បាន​សម្រេច​ដល់​កម្រិតនេះទេ។ ខ្ញុំ​ទទួល​បាន​ជោគជ័យ​ប្រកួត​នៅ​កម្មវិធី​ World​ Lethwei Championship ២​ដង​នៅ​ប្រទេស​មីយ៉ាន់ម៉ា​ ឆ្នាំ​២០១៨-២០១៩ ក៏​បាន​ជាប់​ឈ្មោះ​ជា​«កីឡាការិនី​ឆ្នើម​ប្រចាំ​ឆ្នាំ»។

«ជោគជ័យ​បំផុត​របស់​ខ្ញុំ​លើ​កីឡាការិនី​ថៃ​ Rika​ “Tiny ​Doll”​ Ishige​ ក្នុង​ការប​ង្ហាញ​ខ្លួន​ជា​លើក​ដំបូង​នៅ​កម្មវិធី​ប្រដាល់​ធំ​ ONE Championship​ បាន​ធ្វើ​ខ្ញុំ​ទទួល​បាន​ការ​កោត​សរសើរ​ពី​គ្រប់​មជ្ឈាន​ទូទាំង​ប្រទេស​ និង​ក្រៅ​ប្រទេស​ថែម​ទៀត។ ខ្ញុំ​ពិត​ជា​អរគុណ​ដល់​ ONE​ Championship​ ដែល​ផ្តល់​ឪកាស​ដល់​ខ្ញុំ​ជា​បន្ត​បន្ទាប់»។

នៅ ស្រីពៅ ឈ្នះ​មេដាយ​មាស​ថ្នាក់​ជាតិ (រូបភាព​ផ្តល់​ឲ្យ)

សមិទ្ធផល

  • ឈ្នះ​មេដាយ​មាស​ប្រដាល់​សកល​ថ្នាក់​ជាតិ​ឆ្នាំ​២០១៨
  • ឈ្នះ​មេដាយ​មាស​ប្រដាល់​សកល​ថ្នាក់​ជាតិ​ឆ្នាំ​២០១៩
  • ឈ្នះ​ខ្សែក្រវាត់​គុន​ខ្មែរ​អន្តរជាតិ​ឆ្នាំ​២០១៩
  • កីឡាការិនី​ឆ្នើម​ប្រចាំ​ឆ្នាំ​របស់​ World Lethwei Championship

នៅ ស្រីពៅ បង្ហាញ​ពី​ខ្សែ​ក្រវាត់​គុន​ខ្មែរ​អន្តរជាតិ និង​ស្លាក​សញ្ញា​ប្រកួត​ឈ្នះ​នៅ ONE Championship (រូបភាព​ផ្តល់​ឲ្យ)

តាម​រយៈ​លទ្ធផល​ជ័យជម្នះ​លើ​ឆាក​អន្តរជាតិ​បាន​ផ្តល់​ឲ្យ​ នៅ​ ស្រីពៅ​ ទទួល​បាន​កម្រៃ​គួរ​សម​ដើម្បី​ផ្គត់ផ្គង់​ដល់​ជីវិត​គ្រួសារ​ដែល​ត្រូវ​ការ​ថវិកា​ចាំ​បាច់​រាល់​​ខែ​​ដើម្បី​ព្យាបាល​ជំងឺ​លោក​ឪពុក។ កញ្ញា​បញ្ជាក់​ថា​ ដើរ​មក​ដល់​ថ្ងៃ​នេះ​នៅ​មិន​ទាន់​គ្រប់​គ្រាន់​សម្រាប់​ខ្លួន​ឯង​ និង​ក្រុម​គ្រួសារ​ក៏​ដូច​ជា​សង្គម​ជាតិ​ឡើយ​។ កញ្ញា​ចង់​ទទួល​លទ្ធផល​ពី​ឆាក​អន្តរជាតិ​ឲ្យ​បាន​ធំ​ជាង​នេះ​ថែម​ទៀត​មុន​ពេល​អាយុ​កាន់​តែ​ច្រើន​ដែល​ចុង​ក្រោយ​ចង់​ក្លាយ​ជា​គ្រូ​បង្ហាត់​ប្រដាល់៕

ព័ត៌មានផ្សេងៗ​​​អំពី​ ONE Championship​ សូមចូលទៅកាន់​ www.onefc.com/about-us, follow ​លើ​ Twitter​ និង​ Instagram @ONEChampionshipនិង ​​ហ្វេសប៊ុកONEChampionship

មើល​​បន្ថែម

Stay in the know

Take ONE Championship wherever you go! Sign up now to gain access to latest news, unlock special offers and get first access to the best seats to our live events.
By submitting this form, you are agreeing to our collection, use and disclosure of your information under our Privacy Policy. You may unsubscribe from these communications at any time.